"Ni ‑gbii ‑nɩa 'de Babilɔnɩ‑ "wɛin
137
‑A ‑teɛ i 'de Babilɔnɩ‑ 'a "ni ‑gbuu 'a 'kpʋʋ "kpei,‑aa poɛ Selisalɛmʋ 'a ‑tɩ' ‑kwlʋ o ‑aa jea ‑fɩn".
2 ‑A ‑pee' ‑aa ‑si' ‑plʋ 'mɛ,
'de ti ‑nɩa 'de "ni ‑kwlɩ' i jai.
3 Nyʋ ‑kpa' ‑ʋn kʋʋɔnkwla',
nɩɛ "i ‑a ‑je 'mʋa‑ dʋ ble:
ʋʋ 'na: ao ble Selisalɛmʋ dʋ jrɛ' ke;
4 ka nyɔ 'bɛɛ ɔ 'je Tʋ "bo 'a 'dʋ ble,
'de 'blʋa 'srʋ "kpei ‑ɛ?
5 ‑Bo 'ɩn "mae ‑ma ‑tɩ' o ɛ Selisalɛmʋ,
'ma diiansʋn "mae 'ɩn o.
6 Kɩɩn, 'ma mɩɩɔ 'nɛ 'de 'ma wɔɔn' "jɛi,
‑bo 'ɩn se Selisalɛmʋ 'a ‑tɩ' tɔ' "kpei na a,
‑bo 'ɩn se ɛɛ' ‑tɩ' 'de 'ma 'mʋa‑ ‑tɩ ‑wee'‑ "klein 'a nya poo ɛ.
7 ‑Ɩn po ‑tɩ ‑kwlʋ o, Tʋ "bo,
Edɔmʋ ke Israɛ nɩɛ tʋnyʋ o‑,
'wɩ ‑ɛ 'di Selisalɛmʋ ‑nyʋ nɩa 'kle 'jeea,
ʋʋpʋ‑ ‑wlu ka ʋʋ 'na: ao cɩɛɛn ɛ ‑kwlu',
ao cɛɛn ɛɛ' ‑gban ‑wee'‑ ‑kwlu'.
8 'Oo Babilɔnɩ, ‑ma muɛ ja ‑gbaa',
Nyɔ ‑ɔɔ mua ‑ʋn dɛ ‑ɩn nʋa ‑a "jrii ‑ta,
"jrii nʋa' a, 'mʋa‑ nʋɔ.
9 'Mʋa‑ nʋ nyɔ ‑ɔɔ mua ‑ma "nynuu‑ pliiɛ‑ i
waa 'de "sou "kpei ɛ.